सर्वोच्च अदालत बार एशोसियसनद्वारा बधाई, शुभकामना तथा विदाई कार्यक्रम सम्पन्न

सर्वोच्च अदालत बार एशोशियनले आज नवनियुक्त सम्माननीय प्रधान न्यायाधीश डा.श्री मनोजकुमार शर्माज्यू समक्ष बधाई तथा शुभकामना व्यक्त गर्नुको साथै सेवानिवृत्त पूर्व प्रधान न्यायाधीश श्री प्रकाशमान सिंह राउतज्यूको बिदाई तथा शुखद सेवानिवृत्त जीवनको कामना गर्यो।  सो क्रममा सम्माननीय प्रधान न्यायाधीशज्यूले न्याय निरुपणमा बेञ्च र बारको भूमिका पृथक् र कार्यप्रकृति फरक भए पनि दुवै एकअर्काका परिपूरक तथा अन्योन्याश्रित अंग रहेको बताउनुभयो। न्यायको सुनिश्चितता दुवैको साझा लक्ष्य भएकाले सुदृढ बार बिना सक्षम न्यायपालिका र सक्षम न्यायपालिका बिना सम्मानित कानून व्यवसायको परिकल्पना सम्भव नहुनेमा प्रकाश पार्नुभयो। न्यायिक प्रक्रियामा अनियमितता, बिचौलिया प्रभाव, अनुचित पहुँच, ढिलासुस्ती तथा अपारदर्शिताप्रति शून्य सहनशीलता आवश्यक रहेको र इमानदार, मर्यादित तथा पेशागत आचरणयुक्त कानून व्यवसायीको सहकार्यबाट मात्रै न्यायिक सुशासन सुदृढ हुने उहाँले उल्लेख गर्नुभयो।