कानून बाङ्गमय शताब्दी पुरुष श्री कृष्णप्रसाद भण्डारीज्यूको शताब्दी जन्मोत्सव समारोहमा सम्माननीय प्रधान न्यायाधीशज्यूको प्रमुख आतिथ्यता

मिति 2083/2/28 गते बिहीबार नेपाल बार एशोसिएसनद्वारा आयोजित कानून बाङ्गमय शताब्दी पुरुष, विद्वान वरिष्ठतम् वरिष्ठ अधिवक्ता श्री कृष्णप्रसाद भण्डारीज्यूको शताब्दी जन्मोत्सव समारोहमा नेपाल बार एशोसिएसनको निमन्त्रणामा सम्माननीय प्रधान न्यायाधीशज्यू प्रमुख अतिथिको रुपमा सरिक हुनुभई श्री भण्डारीज्यूले कानून, न्याय, विधिको शासन, मानवअधिकार तथा स्वतन्त्र, सक्षम, उत्तरदायी र पारदर्शी न्यायपालिकाको सुदृढीकरणमा पुर्‍याउनुभएको योगदान अत्यन्त प्रशंसनीय, प्रेरणादायी र स्मरणीय रहेको विचार व्यक्त गर्नुभयो। सो क्रममा उहाँले कानून बाङ्गमय शताब्दी पुरुषको रूपमा सम्मानित हुनुभएका श्री कृष्णप्रसाद भण्डारीज्यूको सात दशकभन्दा लामो कानूनी साधना, कानून व्यवसायको संस्थागत विकास, कानूनी शिक्षा तथा अनुसन्धानको प्रवर्द्धन, कानून व्यवसायीहरूको क्षमता अभिवृद्धि, न्यायिक मूल्यमान्यता र पेशागत नैतिकताको संरक्षण तथा नेपालको कानूनी बाङ्गमयलाई समृद्ध बनाउन पुर्‍याउनुभएको योगदानको उच्च कदर गर्नुभएको थियो। साथै, उहाँले श्री भण्डारीज्यूको ज्ञान, अनुभव, निष्ठा, आत्मअनुशासन तथा स्वस्थ जीवनशैली भावी पुस्ताका लागि समेत प्रेरणाको स्रोत रहने विश्वास व्यक्त गर्नुभयो। उक्त कार्यक्रममा पूर्व प्रधान न्यायाधीश तथा पूर्व प्रधानमन्त्री शुशिला कार्कीज्यू, पूर्व प्रधान न्यायाधीशज्यूहरू, सर्वोच्च अदालतका न्यायाधीशज्यूहरू, न्याय परिषद्का सदस्यज्यूहरू, महान्यायाधिवक्ताज्यू, पूर्व महान्यायाधीवक्ताज्यूहरु, न्यायाधीशज्यूहरू, पूर्व न्यायाधीशज्यूहरु, नेपाल बार एशोसिएसनका पदाधिकारीहरू, वरिष्ठ अधिवक्ताहरू, अधिवक्ताहरू तथा कानुन एवं न्याय क्षेत्रका विशिष्ट व्यक्तित्वहरूको सहभागिता रहेको थियो।