संवैधानिक कानून व्यवसायी मञ्चद्वारा शिष्टाचार भेट

मिति २०८३ असार १८ गते बिहिबार सम्माननीय प्रधान न्यायाधीश डा. श्री मनोजकुमार शर्माज्यूसँग संवैधानिक कानून व्यवसायी मञ्चका पदाधिकारीहरुले शिष्टाचार भेट गरी नवनियुक्त प्रधान न्यायाधीशज्यूलाई बधाई तथा सफल कार्यकालको शुभकामना व्यक्त गर्नुभयो। भेटमा सर्वोच्च अदालतका माननीय न्यायाधीश श्री कुमार रेग्मी समेतको उपस्थिति रहेको थियो । भेटघाटका क्रममा मञ्चमा आवद्ध कानून व्यवसायीहरुले संवैधानिक कानून तथा न्याय प्रशासनको क्षेत्रमा सम्माननीय प्रधान न्यायाधीशज्यूको सबल नेतृत्वमा नेपालको न्यायपालिकाको गरिमा, आस्था र ओज थप अभिवृद्धि हुने अपेक्षा राख्नुभयो ।
सम्मानीय प्रधान न्यायाधीशज्यूले बधाई तथा शुभकामनाप्रति कृतज्ञता प्रकट गर्दै आफू न्यायिक स्वतन्त्रताप्रति पूर्ण रूपमा प्रतिबद्ध रहेको स्पष्ट पार्नुभयो। आफ्नो नियुक्ति नै संविधानको मर्मअनुरूप न्यायिक स्वतन्त्रता र जवाफदेहितालाई सम्बर्द्धन गर्न तथा संविधान र संविधानवादको संरक्षणका निम्ति भएको कुरालाई आफूले मुख्य मार्गदर्शनको रूपमा लिएको उल्लेख गर्नु हुँदै न्यायपालिकाको अक्षुण्णता तथा जनआस्था अभिबृद्धिको लागि न्यायपालिका भित्र र बाह्य सरोकारवालाहरुसँगको सकारात्मक सम्बन्ध निर्माणमा आफ्नो जोड रहने बताउनुभयो। सो क्रममा सुनवाईको प्रत्यक्ष प्रसारणको सवालमा उठेको जिज्ञाषामा न्यायपालिकामा न्यायिक सुशासन र पारदर्शिता प्रवर्द्धन गर्ने उद्देश्यका साथ अदालतका गतिविधिलाई प्रत्यक्ष प्रसारण (Live Streaming) गर्ने  पहल भएको र यसलाई व्यवस्थित नियमन गर्नको निम्ति आवश्यक अध्ययन भइरहेको समेत सम्माननीय प्रधान न्यायाधीशज्यूले जानकारी गराउनुभयो ।