न्यायिक सु-स्वास्थ्यका लागि अन्तर्राष्ट्रिय दिवस, २०२६

न्यायिक क्षेत्रसँग सम्बन्धित जनशक्तिको मानसिक स्वास्थ्य, सन्तुलन र समग्र कल्याण प्रवर्द्धन गर्ने उद्देश्यले न्यायिक सुस्वास्थ्यका लागि अन्तर्राष्ट्रिय दिवस, २०२६ को अवसरमा सर्वोच्च अदालतद्वारा आयोजित कार्यक्रम सु-सम्पन्न भएको छ।
उक्त कार्यक्रमको अध्यक्षता सर्वोच्च अदालतका माननीय न्यायाधीश श्री कुमार रेग्मीले गर्नु भएको थियो भने प्रमुख अतिथिका रूपमा सर्वोच्च अदालतका सम्माननीय कायम मुकायम प्रधान न्यायाधीश श्री सपना प्रधान मल्लज्यूको उपस्थिति रहेको थियो। कार्यक्रममा सर्वोच्च अदालतका माननीय न्यायाधीशज्यूहरू, न्यायाधीश पत्नीज्यू, मुख्य रजिष्ट्रार, रजिष्ट्रार लगायत न्यायिक तथा प्रशासनिक कर्मचारीहरूको उल्लेखनीय सहभागिता रहेको थियो।
कार्यक्रममा सह-रजिष्ट्रार श्री बाबुराम दाहालले स्वागत मन्तव्य व्यक्त गर्दै कार्यक्रमको उद्देश्यबारे प्रकाश पार्नु भएको थियो भने मुख्य रजिष्ट्रार श्री बिमल पौडेलले मन्तव्य व्यक्त गर्नु भएको थियो। प्रमुख वक्ताका रूपमा सर्वोच्च अदालतका माननीय न्यायाधीश श्री बालकृष्ण ढकालले न्यायिक कार्यसम्पादनमा मानसिक सुदृढताको महत्वबारे विशेष धारणा राख्नु भएको थियो।
कार्यक्रममा प्रमुख अतिथिका रुपमा सम्माननीय कायम मुकायम प्रधान न्यायाधीश श्री सपना प्रधान मल्लज्यूले न्याय सम्पादन प्रक्रियामा संलग्न न्यायाधीश तथा कर्मचारीहरू मानसिक रूपमा सबल, सन्तुलित र स्वच्छ हुनु अत्यन्त आवश्यक रहेकोमा जोड दिनु भएको थियो। भौतिक, कानूनी तथा अन्य पूर्वाधारहरू पर्याप्त भए तापनि यदि न्यायिक जनशक्ति मानसिक रूपमा अशान्त वा असन्तुलित अवस्थामा रहेमा प्रभावकारी र निष्पक्ष न्याय सम्पादन सम्भव नहुने विषयमा उहाँहरूले विशेष रूपमा औंल्याउनु भएको थियो।
ओशो तपोवनका ध्यान प्रशिक्षक तथा लेखक स्वामी आनन्द अरहत ले “Inner Balance, Outer Justice: Nurturing Wellness in the Judiciary” विषयमा प्रवचन दिनु भएको थियो। उहाँले आन्तरिक सन्तुलन र मानसिक स्वास्थ्यले न्यायिक कार्यको गुणस्तरमा पार्ने सकारात्मक प्रभावबारे सहभागीहरूलाई मार्गदर्शन गर्नु भएको थियो।
उक्त कार्यक्रमले न्यायिक क्षेत्रमा कार्यरत जनशक्तिको मानसिक सुदृढता अभिवृद्धि गरी समग्र न्याय प्रणालीलाई अझ प्रभावकारी, उत्तरदायी र निष्पक्ष बनाउन महत्वपूर्ण योगदान पुर्‍याउने विश्वास लिँदै कार्यक्रमको अध्यक्ष माननीय न्यायाधीश श्री कुमार रेग्मीज्यूले समापन मन्तव्य राख्नुभएको थियो। कार्यक्रममको सञ्चालन शाखा अधिकृत मनिता कार्कीज्यूले गर्नुभएको थियो।